H. Bujar Spahiu merr presidencën e KNFSH-së për vitin 2023
Nga data 1 janar 2023, sipas rotacionit të miratuar nga Bordi i Presidencës së KNFSH-së në 2018, detyrën e kreut të Këshillit Ndërfetar për vitin 2023 e ka marrë kryetari i Komunitetit Mysliman të Shqipërisë Haxhi Bujar Spahiu.
Jetëshkrimin e Kryetarit të KNFSH-së mund ta lexoni më poshtë:
Pasi mbaroi arsimin 8-vjeçar në Shkollën “Lidhja e Prizrenit” në Kolesjan, ai u bë pjesë e kontingjentit të parë të studentëve që u nisën nga Komuniteti Mysliman i Shqipërisë drejt Turqisë në vitin 1992.
Kështu më 1996 ai kreu Medresenë Bejkoz në Stamboll, Turqi.
Më pas përfundoi studimet teologjike universitare dhe pasuniversitare në Universitetin e Ez’herit në Kajro, Egjipt në vitin 2003 në fushën e Tefsirit (interpretimi i Kur’anit).
Bujar Spahiu ka një kontribut të gjatë në Komunitetin Mysliman të Shqipërisë, ku ka shërbyer si drejtor në Drejtorinë e Arsimit në KMSH nga viti 2006 deri në vitin 2009 dhe nga viti 2009 deri në vitin 2019 ka ushtruar detyrën e nënkryetarit në këtë institucion. Prej vitit 2019 ai është zgjedhur Kryetar i Komunitetit Mysliman të Shqipërisë.
Bujar Spahiu ka marrë pjesë dhe ka përfaqësuar Komunitetin Mysliman në shumë takime të rëndësishme, organizime të ndryshme, konferenca, simpoziume kombëtare dhe ndërkombëtare.
Gjithashtu Spahiu ka qenë i angazhuar në mësimdhënie në Departamentin e Shkencave Islame në Universitin Bedër dhe medresetë e Komunitetit Mysliman të Shqipërisë në fushën e specializimit të tij.
Spahiu është i martuar dhe ka dy fëmijë, një djalë dhe një vajzë.
Shpërndarja tregon përkujdesje
