Më datë 8 shator 2020, Departamenti i Gruas në Këshillin Ndërfetar të Shqipërisë, organizoi një takim miqësor me Ambasadoren e Ambasadës së Suedisë në Tiranë Shkëlqesinë e Saj znj. Elsa Hastad.
Diskutimi interaktiv, u zhvillua me pjesëmarrjen e grave dhe vajzave përfaqësuese të komuniteteve tradicionale fetare të Shqipërisë, pjesë aktive e Këshillit Ndërfetar, duke prezantuar secila besimin dhe komunitetin, që përfaqëson dhe rolin e tyre në bashkëpunimin ndërfetar.
Gjatë këtij bashkëbisedimi ambasadorja vlerësoi frymën e bashkëpunimit ndërfetar të tyre dhe i siguroi ato se bashkëpunimi ndërinstitucional i Departamentit të Gruas në Këshillin Ndërfetar të Shqipërisë dhe Ambasadës së Suedisë në Tiranë do të jetë i vazhdueshëm, sidomos në aktivitete me tematika të tilla si, promovimi i të drejtave të grave dhe vajzave, barazisë gjinore në punësim, familje e pagë, si dhe në tematika të tjera, që lidhen me fuqizimin e rolit të gruas në shoqëri.
Në këtë takim u diskutuan dhe tema të tilla si, diskriminimi i grave të mbuluara, ose të atyre që mbajnë simbole fetare gjatë aplikimit për punësim në sektorin publik dhe jopubik; prania e ulët e grave në lidershipin e administratës, sidomos e atyre që mbajnë veshje fetare; fuqizimi ekonomik i gruas, fushë për të cilën Ambasada Suedeze ofron bashkëpunim me financim iniciativash të reja biznesi nga të rejat dhe gratë; problemet e radikalizmit dhe ekstremizmit të dhunshëm, etj.
Departamenti i Gruas në Këshillin Ndërfetar të Shqipërisë është themeluar vitin e kaluar nga Bordi i Presidencës në KNFSH dhe po luan një rol aktiv në aktivitete të ndryshme sociale, duke promovuar në forma të ndryshme bashkëpunimin dhe dialogun ndërfetar.
