Një delegacion nga Zyra Ndërkombëtare për Lirinë e Besimit (IRF) në Departamentin e Shtetit, SHBA, i përbërë nga z. Michael Dozler, Shefi i Njësisë për Europën në Zyrën IRF dhe znj. Sonia Fernandes, Zyrtare Politikash, zhvilluan një takim me Bordin Ekzekutiv të Këshillit Ndërfetar të Shqipërisë. Në takimin e zhvilluar në ambientet e Universitetit Bedër, delegacioni i shoqëruar nga znj. Amelia Hintzen dhe znj. Irena Taga përfaqësuese të ambasadës së SHBA-së në Tiranë, u prit nga Sekretari i Përgjithshëm i KNFSH-së Prof. Asoc. Dr. Genti Kruja dhe anëtarë të Bordit Ekzekutiv të Këshillit Ndërfetar të Shqipërisë.
Në këtë takim u diskutua rreth çështjeve të rëndësishme, që lidhen me lirinë e besimit dhe dialogun ndërfetar në Shqipëri, ku përfaqësuesit e IRF-së shprehën interesin e tyre për të mësuar më shumë rreth aktiviteteve dhe nismave të Këshillit Ndërfetar të Shqipërisë në promovimin e harmonisë ndërfetare dhe respektit reciprok ndërmjet bashkësive të ndryshme fetare në Shqipëri.
Gjatë takimit, anëtarët e Bordit Ekzekutiv prezantuan aktivitetet kryesore të Këshillit Ndërfetar, duke theksuar angazhimin e tyre për të forcuar bashkëpunimin ndërfetar dhe për të ndërtuar ura mirëkuptimi ndërmjet grupeve të ndryshme të shoqërisë shqiptare. Ata u ndalën në rolin e rëndësishëm të arsimit dhe edukimit të komuniteteve fetare në promovimin e frymës së dialogut për brezat e rinj, por edhe për sfidat dhe problemet në lidhje me marrëdhëniet me shtetin shqiptar, Censusin, projektligjet e ndryshme dhe problemin për mos kthimin dhe kompensimin e pronave në më shumë se tre dekada të lirisë së besimit.
Michael Dozle dhe znj. Sonia Fernandes vlerësuan lart Këshillin Ndërfetar dhe modelin e harmonisë ndërfetare në Shqipëri, si një model të veçantë dhe frymëzues. Ata përgëzuan gjithashtu punën e bërë ndër vite dhe shfaqen një interes të lartë për të mësuar më shumë rreth historikut dhe aktiviteteve të KNFSH-së.
Vizita e përfaqësuesve të IRF-së në Shqipëri pasqyron interesimin ndërkombëtar për promovimin e lirisë së besimit dhe rëndësinë e forcimit të dialogut ndërfetar, si një faktor kyç për paqen dhe stabilitetin shoqëror. Vlen të theksohet se Këshilli Ndërfetar dhe modeli i tij përmendet çdo vit në raportin e lirisë së besimit të Departamentit të Shtetit për Shqipërinë. Vitin e fundit, KNFSH është futur dhe si model i praktikave më të mira (best practice) edhe në raportin e lirisë së besimit të OSCE/ODIHR-it./01.04.2025
