Potsdam, Gjermani – 16 Korrik 2025
Ne, anëtarët e Bordit të Presidencës së Religions for Peace Europe, të mbledhur në Universitetin e Potsdamit më 15–16 Korrik 2025, riafirmojmë solemnitetin e përkushtimit tonë të përbashkët për ndërtimin e paqes, dialogun ndërfetar dhe bashkëpunimin e qëndrueshëm midis komuniteteve fetare në mbarë Evropën dhe më gjerë.
Gjatë këtij takimi dyditor, u angazhuam në reflektime të thella dhe planifikime strategjike, me fokus të veçantë fuqizimin e të rinjve dhe grave në përpjekjet për paqe, forcimin e dialogut ndërfetar dhe thellimin e bashkëpunimit brenda strukturave tona evropiane – përfshirë Këshillat Ndërfetarë të Evropës, Këshillin Evropian të Liderëve Fetarë, Rrjetin Evropian të Grave Besimtare dhe Rrjetin Evropian Ndërfetar të të Rinjve.
Në këtë moment kritik për njerëzimin, nuk mund të qëndrojmë të heshtur përballë katastrofës humanitare që po ndodh në Gaza. Shprehim shqetësimin tonë të thellë për humbjen tragjike të jetëve të pafajshme, veçanërisht mes fëmijëve dhe grave.
Bëjmë një thirrje urgjente për komunitetin ndërkombëtar dhe liderët fetarë anembanë globit që të veprojnë menjëherë për t’i dhënë fund dhunës, për të garantuar akses të pakufizuar humanitar dhe për të mbrojtur dinjitetin njerëzor. Religions for Peace Europe kërkon një armëpushim të menjëhershëm dhe kthim drejt paqes përmes dialogut, drejtësisë dhe respektimit të të drejtave të njeriut.
Këtë vit shënohet një përvjetor domethënës – 55-vjetori i themelimit të Religions for Peace. Ky jubile na kujton trashëgiminë tonë të pasur të veprimit të përkushtuar ndërfetar për paqe dhe forcon vendosmërinë tonë për të ecur përpara me më shumë unitet dhe qëllim të përbashkët.
Ne, anëtarët e Bordit të Presidencës së Religions for Peace Europe, riafirmojmë përkushtimin tonë për një Evropë të bashkuar, të ndërtuar përmes dialogut, përfshirjes dhe përgjegjësisë së përbashkët për të mirën e përbashkët.
Faleminderit!
