Më 30-31 tetor 2026, u zhvilluan në Berat Konsultimet Kombëtare të Këshillit Ndërfetar të Shqipërisë me pjesëmarrjen e anëtarëve të Bordit Ekzekutiv, Departamentit të Gruas dhe Departamentit të Rinisë, si dhe përfaqësuesve të komuniteteve fetare vendore. Veprimtaria u organizua me mbështetjen e Religions for Peace në bashkëpunim me Këshillin Ndërfetar të Shqipërisë.
Konsultimet u përqendruan në forcimin e bashkëpunimit ndërfetar përballë sfidave shoqërore dhe në qasjen e “Lulëzimit të Përbashkët të Shenjtë”. Përmes reflektimeve nga traditat fetare, diskutimeve dhe punës në grupe të përziera, pjesëmarrësit trajtuan vlerat e dinjitetit njerëzor, dhembshurisë, përgjegjësisë dhe kujdesit për jetën, duke shqyrtuar mundësitë për t’i shndërruar këto vlera në angazhim të përbashkët.
Dita e parë iu kushtua njohjes së trashëgimisë fetare e kulturore të Beratit, përmes vizitave në objektet e kultit dhe komunitete fetare, si dhe seancës së parë të trajnimit dhe njohjes së njëri-tjetrit. Tradita e bashkëjetesës së qytetit shërbeu si pikënisje për reflektimin mbi marrëdhëniet ndërfetare dhe përgjegjësinë për t’ua përcjellë këtë trashëgimi brezave të rinj.
Dita e dytë u hap me Forumin Ndërfetar të Beratit, i cili bashkoi drejtues dhe përfaqësues fetarë me përfaqësues të institucioneve publike dhe të jetës shoqërore vendore. Programi vijoi me sesionet e konsultimeve kombëtare, të zhvilluara përgjatë gjithë ditës.
Në sesionet tematike u trajtuan botëkuptimet e shenjta të traditave fetare dhe koncepti i “Botëkuptimit të Përbashkët të Shenjtë”, duke respektuar identitetin dhe veçantinë e secilit besim. Një vëmendje e posaçme iu kushtua marrëdhënieve me të Shenjtën, me njerëzit, me shoqërinë dhe me Tokën, si dhe lidhjes së tyre me misionin dhe përgjegjësitë e KNFSH-së.
Moderimin dhe lehtësimin e sesioneve e mbështetën Sonila Rembeci, Mehmet Disha, Ana Bërbati, Ada Lushi dhe Sheldiana Jano Agaraj. Sesioni mbi veprimin e përbashkët në kontekstin shqiptar u drejtua nga Prof. Genti Kruja, President i Religions for Peace Europe dhe Sekretar i Përgjithshëm i KNFSH-së. Diskutimet u përqendruan në identifikimin e sfidave, analizimin e shkaqeve të tyre dhe mundësitë për mobilizimin e burimeve të komuniteteve fetare në shërbim të së mirës së përbashkët.
Nga puna në grupe dolën në pah çështje që lidhen me pronat dhe objektet e kultit, informimin juridik të komuniteteve fetare, si dhe edukimin mbi fenë në shkolla dhe kuptimin e laicitetit në raport me lirinë e besimit. Pjesëmarrësit propozuan trajnime të përbashkëta me institucionet vendore për trajtimin e çështjeve të pronave dhe objekteve të kultit, zgjerimin e bashkëpunimit të KNFSH-së me komunitetet lokale dhe nisma të përbashkëta për të drejtat e njeriut. Gjithashtu, u theksuan respekti për traditat dhe praktikat e secilit besim, kujdesi për familjen dhe të moshuarit, solidariteti me njerëzit në nevojë, etika e komunikimit dhe mbrojtja e mjedisit.
Konsultimet vijuan punën e nisur me Trajnimin e Trajnerëve për “Lulëzimin e Përbashkët të Shenjtë”, të zhvilluar në Tiranë në korrik 2026. Ato krijuan hapësirë për përfshirjen e grave dhe të rinjve në reflektimin ndërfetar dhe në përgatitjen e propozimeve për bashkëpunim të mëtejshëm.
Veprimtaria u përmbyll me reflektimet e pjesëmarrësve dhe mbledhjen e rekomandimeve, me synim që dialogu ndërfetar të përkthehet në nisma konkrete për paqen, edukimin, kohezionin shoqëror dhe kujdesin për mjedisin. Në përfundim, të gjithë pjesëmarrësve iu shpërndanë certifikata pjesëmarrjeje.
