Trajnimi Rajonal Evropian i Trajnuesve mbi “Shared Sacred Flourishing” përfundoi me sukses në Tiranë, duke mbledhur përfaqësues të këshillave ndërfetarë europianë nga organizata ndërkombëtare Religions for Peace Europe, komuniteteve fetare, rrjeteve të grave dhe të rinjve, institucioneve akademike, organizatave të shoqërisë civile dhe institucioneve partnere nga Shqipëria, Bosnja dhe Hercegovina, Finlanda, Gjermania, Greqia, Italia dhe Spanja.
Programi u zhvillua nën drejtimin e znj. Deepika Singh, Zëvendëssekretare e Përgjithshme e Religions for Peace International, dhe Prof. Genti Kruja, President i Religions for Peace Europe dhe Sekretar i Përgjithshëm i Këshillit Ndërfetar të Shqipërisë. Pjesëmarrja dhe drejtimi i tyre institucional evidentuan rëndësinë e bashkëpunimit të ngushtë ndërmjet strukturave globale, evropiane dhe kombëtare të Religions for Peace për avancimin e Mirëqenies së Përbashkët të Shenjtë në të gjithë rajonin europian.
Aktiviteti disa ditor i organizuar nga Religions for Peace International, Religions for Peace Europe dhe European National Interreligious Bodies, në bashkëpunim me Këshillin Ndërfetar të Shqipërisë – Religions for Peace Albania, synoi t’i pajisë pjesëmarrësit me njohuritë, metodologjitë dhe mjetet praktike të nevojshme për promovimin e bashkëpunimit ndërfetar, ndërtimit të paqes, kohezionit social dhe së mirës së përbashkët në Evropë.
Trajnimi u lehtësua nga Emina Frljak dhe Omer Faruk Karacan, të cilët udhëhoqën pjesëmarrësit gjatë tri ditëve me prezantime, reflektime, ushtrime ndërvepruese dhe punë në grupe, në një mjedis mësimor të hapur dhe gjithëpërfshirës.
Dita e parë, e organizuar në Kryegjyshatën Botërore Bektashiane, u përqendrua në prezantimin e koncepteve themelore të Botëkuptimit dhe Mirëqenies së Përbashkët të Shenjtë, si dhe në shqyrtimin e mënyrës se si botëkuptimet fetare dhe shpirtërore formësojnë kuptimin e njerëzve për realitetin, jetën njerëzore, shoqërinë, përgjegjësinë dhe mirëqenien.
Gjatë sesionit të titulluar “Shoqëria si një tërësi njerëzish të plotë”, Dr. Skender Bruçaj, pedagog universitar dhe ish-Kryetar i Komunitetit Mysliman të Shqipërisë, reflektoi mbi rolin e familjeve, komuniteteve, institucioneve dhe sistemeve shoqërore në avancimin e së mirës së përbashkët dhe në ndërtimin e një shoqërie më të drejtë, gjithëpërfshirëse dhe të dhembshur.
Dita përfundoi me një vizitë kulturore dhe reflektuese në Bunk’Art 1 dhe me një darkë të përbashkët në Tiranë.
Dita e dytë, me temën “Nga botëkuptimi te veprimi”, u përqendrua në shndërrimin e vlerave të përbashkëta të shenjta dhe parimeve etike në iniciativa konkrete përmes bashkëpunimit ndërfetar.
Pjesëmarrësit shqyrtuan strukturat e Religions for Peace në nivel vendor, kombëtar, rajonal dhe global dhe diskutuan se si përfaqësimi, subsidiariteti dhe veprimi i koordinuar kontribuojnë në një bashkëpunim shumëfetar efektiv.
Një sesion i posaçëm mbi Metodën e Veprimit të Religions for Peace u drejtua nga Prof. Genti Kruja. Duke u mbështetur në përgjegjësitë e tij si President i Religions for Peace Europe dhe Sekretar i Përgjithshëm i Këshillit Ndërfetar të Shqipërisë, ai paraqiti mënyrën se si komunitetet fetare, institucionet arsimore, këshillat ndërfetarë dhe organizatat partnere mund t’i shndërrojnë vlerat e përbashkëta në iniciativa praktike dhe të koordinuara që adresojnë sfidat bashkëkohore të shoqërisë. Ai ndau përvojën shqiptare të bashkëjetesës paqësore, duke vënë në pah rolin e Këshillit Ndërfetar të Shqipërisë dhe të institucioneve arsimore të komuniteteve fetare në promovimin e dialogut ndërfetar.
Pjesëmarrësit u njohën gjithashtu me Analizën e Përbashkët të Shenjtë, një kornizë metodologjike për shqyrtimin e sfidave në dimensionet e tyre materiale, shoqërore, shpirtërore, etike dhe morale. Sesioni u lehtësua nga Dr. Hysni Skura, anëtar i Bordit të Religions for Peace Europe.
Gjatë sesionit mbi Shquarjen e së Mirës së Përbashkët, pjesëmarrësit vlerësuan përgjigje të mundshme ndaj sfidave shoqërore dhe identifikuan veprime të afta për të avancuar Mirëqenien e Përbashkët të Shenjtë. Diskutimi përfshiu një kontribut të çmuar nga znj. Lejdi Dervishi, Drejtore e Qendrës së Koordinimit kundër Ekstremizmit të Dhunshëm në Shqipëri.
Duke punuar në grupe, pjesëmarrësit zbatuan Metodën e Veprimit të Religions for Peace për të hartuar përgjigje të koordinuara dhe bashkëpunuese ndaj sfidave reale. Sesionet u zhvilluan në Universitetin Epoka.
Forcimi i Partneriteteve dhe Adresimi i Sfidave Globale
Dita e tretë dhe e fundit u përqendrua në integrimin e Mirëqenies së Përbashkët të Shenjtë në punën e këshillave kombëtarë ndërfetarë dhe organizatave partnere, në forcimin e partneriteteve institucionale dhe në përgatitjen e pjesëmarrësve për zhvillimin e trajnimeve kombëtare dhe konsultimeve me shumë aktorë në vendet e tyre.
Një nga pikat kulmore të programit ishte ligjërata “Partneritetet thelbësore”, e mbajtur nga Prof. Dr. Gjergji Sinani, Rektor i Universitetit Bedër dhe Profesor i Filozofisë së Fesë. Ai theksoi rëndësinë e bashkëpunimit kuptimplotë ndërmjet komuniteteve fetare, qeverive, shoqërisë civile, institucioneve akademike dhe organizatave ndërkombëtare, duke ruajtur njëkohësisht integritetin e Botëkuptimit të Përbashkët të Shenjtë.
Prof. Dr. Joan Hernandez Serret, Profesor në Universitetin e Katalunjës dhe Sekretar i Përgjithshëm i Religions for Peace Spain, mbajti prezantimin me titull “Zbatimi i Mirëqenies së Përbashkët të Shenjtë ndaj sfidave globale”. Ai shqyrtoi se si këto tema mund të udhëheqin përgjigje bashkëpunuese ndaj çështjeve komplekse globale dhe të frymëzojnë veprim kolektiv në kontekste të ndryshme kulturore dhe fetare.
Gjatë sesioneve përmbyllëse, pjesëmarrësit reflektuan mbi mësimet e nxjerra dhe hartuan planet kombëtare të zbatimit. Ata identifikuan angazhime konkrete dhe hapat e ardhshëm për organizimin e programeve kombëtare të trajnimit dhe konsultimeve me shumë aktorë, me vëmendje të veçantë ndaj pjesëmarrjes gjithëpërfshirëse, partneriteteve të qëndrueshme dhe veprimit të koordinuar.
Në përfundim të programit, Deepika Singh dhe Genti Kruja theksuan përgjegjësinë e pjesëmarrësve për të përcjellë njohuritë dhe metodologjinë e përfituar në Tiranë në kontekstet e tyre kombëtare dhe vendore. Ata nënvizuan se përfundimi i trajnimit rajonal nuk ishte fundi i procesit, por fillimi i një faze më të gjerë evropiane me trajnime kombëtare, konsultime, partneritete dhe iniciativa praktike.
Përfundimi me sukses i Trajnimit Rajonal Evropian të Trajnuesve përfaqëson një moment të rëndësishëm në forcimin e bashkëpunimit ndërmjet Religions for Peace International, Religions for Peace Europe, ENIB dhe këshillave kombëtarë ndërfetarë nga shtatë shtete të Europës.
Përmes drejtimit të Religions for Peace, kontributit të lehtësuesve dhe folësve të ftuar, si dhe angazhimit aktiv të pjesëmarrësve, programi krijoi një bazë të përbashkët për avancimin e paqes, dialogut, kohezionit social, zhvillimit të qëndrueshëm dhe së mirës së përbashkët në të gjithë Evropën.
